Ռեզյումեն պատմում է, թե ինչ եք արել, իսկ ուղեկցող նամակը՝ ինչու եք ուզում աշխատել հենց այստեղ։ Շատ գործատուներ կարդում են նախ նամակը և միայն հետո բացում ռեզյումեն։ Եթե հայտարարությունում նամակ չի պահանջվում, կարճ նամակը, միևնույն է, Ձեզ կառանձնացնի։
Կառուցվածքը
- Դիմում. «Հարգելի պարոն Պետրոսյան» կամ, եթե անունը չգիտեք, «Հարգելի HR թիմ»
- Առաջին պարբերություն. որ պաշտոնին եք դիմում և որտեղից եք իմացել
- Երկրորդ պարբերություն. 1–2 կոնկրետ ձեռքբերում, որոնք կապված են պաշտոնի պահանջների հետ
- Երրորդ պարբերություն. ինչու հենց այս ընկերությունը և առաջարկ՝ հանդիպել
- Ավարտ. «Հարգանքով», անուն, հեռախոս
Օրինակ
Հարգելի տիկին Հակոբյան,
Դիմում եմ staff.am-ում հրապարակված «Մարքեթինգի մասնագետ» թափուր հաստիքի համար։
Վերջին երկու տարին աշխատել եմ որպես SMM մասնագետ առցանց խանութում, որտեղ Instagram-ի էջի հետևորդների թիվը 8 000-ից հասցրել եմ 45 000-ի, իսկ գովազդից եկող վաճառքները՝ եռապատկել։ Ձեր հայտարարությունում նշված է Meta Ads-ի և կոնտենտ պլանավորման փորձ. դրանք հենց այն են, ինչով զբաղվում եմ ամեն օր։
Հետևում եմ Ձեր ընկերության նոր արտադրանքի ներկայացմանը և կցանկանայի մասնակցել դրա աճին։ Ուրախ կլինեմ հանդիպել և ավելի մանրամասն ներկայացնել իմ աշխատանքները։
Հարգանքով՝
Անի Սարգսյան
+374 XX XXX XXX
Կանոններ
- Ոչ ավելի, քան 250 բառ
- Յուրաքանչյուր ընկերության համար փոխեք գոնե երրորդ պարբերությունը
- Մի կրկնեք ռեզյումեն բառացի. ընտրեք մեկ-երկու ամենաուժեղ փաստը
- Եթե ուղարկում եք էլ. փոստով, նամակի տեքստը գրեք հենց նամակում, իսկ ռեզյումեն կցեք PDF-ով
Ռեզյումեն պատրաստ չէ՞։ Սկսեք քայլ առ քայլ ուղեցույցից։
